قالولى انتحارى

قالولى انتحارى
قالولى انتحارى
جاوبت بحقيقى
دا اسم اجبارى
لقيته فـ طريقى
بتسألنى ليه
هقولك يا بيه
بناكل كيماوى ونشرب سموم
دا غير البلاوى وغير الهموم
فى أزمة طماطم نبيع الهدوم
ونمشى فـ مجارى وميت سم هارى
ولسه انت تانى بتسألنى ليه
قالولى انتحارى هقولك يا بيه
بنغرق فـ باخرة
نموت تحت صخرة
فـ قلب الدويقه
طب الحق وحوش
كلونا القروش
فـ السلام الغريقة
وتسمع منافق وكداب أرارى
يقولك دى حادثة وظرف اضطرارى
قالولى انتحارى
دا شعبك مسلطن فـ حضن التلوث
وواكل مسرطن ودمه ملوث
وهو يقولك دا كله نضيف
أقوله يا راجل طب اسأل نظيف
واقوله اتهرينا
خلاص استوينا
كلامك دا لينا
نسيت اللى حاصل
نسيت هايدلينا
وعيب لما اقولك تقولى ما دارى
قالولى انتحارى
حكومة وعامله علينا عصابة
ومجلس بياكل بدم الغلابة
كبيرنا فـ داره وعايش منعم
ويصدر قراره ويلغى المدعم
ولو مره تشكى هتشكى لمين
هتدخل فـ توهه ومتاهه لسنين
ما بين عضو مجلس بيلعب أتارى
وغيره بيسرق فى قوتنا ومدارى
قالولى انتحارى
نسيت الطابور اللى فوق الرصيف
وكام ألف عركه عشان الرغيف
وشعبى اللى ماشى وواكل داتوره
يفكر هيدفع منين الفاتوره
ما بين ميه قاطعه
ونور فـ المقاطعه
يا ليل مالوهش آخر
ما فيش شمس ساطعه
دا إمتى يا عالم هيطلع نهارى
قالولى انتحارى
نسيت البطاله
نسيت الزباله
وناس ماشيه تايهه
حالتهم دى حاله
نسيت الفساد اللى خالق رشاوى
نسيت الروتين اللى عامل بلاوى
مصالحك يا غاوى
بتخلص بغمزه ودمغه وحواله
نسيت شعب ماشى مسالم لطيف
ومش لاقى قوته وبينام خفيف
وشايل همومه وهم يجيب فـ هم
حياتنا سعادتك كئيبة تغم
وتمثال سيادتك دا أعمى وأصم
وكلمه جريئه على لسان عم نجم
يا ريس شريفك ماهواش شريف
نظيفك يا ريس ماهواش نظيف
وحتى حبيبك ماهواش حبيب
وإحنا يا ريس دفنا التراب
حياتنا يا ريس تعب فوق عذاب
باعونا يا ريس مافيش حد شارى
قالولى انتحارى
[center]

فعلاً مساهمة رائعة بس ياريت تكتب اسم الشاعر وأظن أنا الشاعر هو فؤاد نجم